ملحمة كويتية

قمت من النوم الصبح على صوت قطرات المطر اللي تدغدغ زجاج نافذتي، ما أحلاه من صوت ويا حلوها من قومة.
غسلت وجهي وفرشت أسناني بمعجون بارد بطعم النعناع المركز وبعدها رحت أشوف ما فاتني من رسائل على هاتفي، لقيت قروب الديوانية بالواتساب مشعلل بالمسجات، طليت أشوف المسجات ولا ألاقي حسينو داز أغنية بصوته الأجش والعموم قاعد يضحك عليه، لكني شجعته وطالبته إن كل يوم يغني لنا بالقروب عشان نصبح على صوته ونبدا يومنا بابتسامة وضحكة تساعدنا على تجاوز يومنا الطويل بسهولة.
رحت لبست دشداشتي وخذيت شمسيتي على أمل إني أستخدمها لأول مرة داخل الكويت، لكن طبعا مع طلعتي من البيت كانت الشمس طالعة والمطر مخلص ما يمدينا نتهنا فيه.
ياني اتصال وأنا بالسيارة على الدائري الخامس من صاحبي هويشم يقول لي لا تاخذ طريج الفحيحيل ترى واقف، وفعلا تلاحقت عمري ونزلت على الملك فهد، بس كان واقف أيضاً لأن في حادث بين سيارتين بالحارة الثانية والعموم قاعد يطل بيشوف شالسالفة.
وصلت الاجتماع اللي كنت رايح له وتأخرت عليه شوي، وكنت حدي منحرج من التأخير لأن طفارتي عدم الالتزام بالوقت، لكن العموم كان متأخر والسبة الزحمة اللي ما لها حل بكل وقت بهالديرة.
وأنا بالاجتماع سرحت شوي وطرت على بالي حبيبتي اللي تحملتني وايد وأنا كنت دايما ناشف معاها، ومع هذا كانت تتحمل وترضى إلا إني أنهيت العلاقة وأنا الغلطان أكيد.
فكرت شلون أراضيها وقلت ماكو إلا إني أشوف وين بتروح هاليومين، وأفاجئها وأكيد بيفز قلبها بشوفتي، وفعلا رحت أدور على أكاونتها بإنستغرام ليما لقيته، بس كانت حاطته برايفت فقررت أن أدورها بتويتر وما لقيتها بس من حظي لقيت هنادي رفيجتها كاتبة بتويتر إنها رايحة البدع مع البنات… قلت أكيد حبيبتي بتكون معاها لأن هنادي ما تطلع إلا مع حبيبتي، وفعلا رحت الصالون عند عمار اللي أحلق عنده من زمان، وقلت له: ضبطني عدل وراي موعد الليلة.
عقب ما خلصت كتبت بقروب الديوانية منو يروح معاي البدع؟ محد رد علي إلا عزوز، وقلت له أمرّك بعد ساعتين ونروح.
رجعت البيت سبحت وبدلت ولبست بنطلوني الأسود مع القميص البيج وإهوا اللون اللي تحبه، ومريت عزوز ورحنا البدع، قعدنا بالكافيه بالطاولة اللي ورا هنادي، وما شافتني بس الصدمة إن حبيبتي ما كانت معاها!!
شوي ولا أشوف هنادي تنادي اسم حبيبتي، وتقول: كاهي وصلت، استانست والتفت عليهم عشان أفاجئها، ولكن أنا اللي تفاجأت إن حبيبتي إيدها بإيد واحد، وهنادي ورفيجاتها يقولون لها مبروك.
اعتفست وصفنت وما وعيت إلا على رنة مسج بقروب الديوانية من نصّور يقول متى بتروحون؟
ما سبق جزء من روايتي القادمة وسيحدد موعد التوقيع عليها لاحقا.

ضمن نطاق التغطية:
العلة ليست في رواج مثل تلك الروايات، ولكن أن يطغى هذا النوع من الإنتاج على الإصدارات المحلية يثبت عمق الأزمة التي تعيشها الكويت في شتى المجالات، فبئسا لناشر وافق على الطباعة، وقارئ شجع هذه النوعية، وحكومة لا ينبئها هذا الانحدار بخطورة ما وصلنا إليه.

ملاحظة:
أعيد نشر هذا المقال بالتزامن مع معرض الكتاب الدولي لاستمرار وانتشار هذه الحالة غير الأدبية في المكتبات ودور النشر.