الوسم: قصائد

يا ما اكبر الفرق بين أفعالكم والخطاب

كم كلمةٍ ما دعمها فِعْل من قالها

تناطح أفكاركم ما اثمر لنا الا الخراب

لولاكم الدار زانت وانصلح حالها

فرّج على ناخيك لو هو معاديك..

لا تقفل أبوابٍ وعند الله أبواب..

واسعى عسى الله لا يخيّب مساعيك..

تلقى جزاك ومن رجا الله ما خاب.

يا مسلمين! الدين غير الأساطير

الدين صدْق وحُسن خلق وعبادة

والعاقل اللي يدفع الشر بالخير

يزيده الله من نعيمه زيادة

الكلام أكثر من الفعل يا أصحاب العقول

والحقيقة بيّنة والعيون تشوفها

قلْ وغيرك يقدر يقول مثل اللي تقول

كلمةٍ طبق الأصل رَسْمَها وحروفها

عندك حلولٍ كثيرة ولا شفنا حلول

جيت أطوفها وعيّت وقلت آطوفها

جدّك فعل!! ولغيره أفعال وأفعال

لا صار مالك فعل وش تدّعي له؟؟

غيرك ورث مجده على مرّ الاجيال

يُذكر ليا ذكْرَتْ فعولٍ جميله

والا أنت خبلٍ غرّك الجاه والمال

ولا كسبت بمالك الا الفشيله!

يا قاتلين العساكر في بلاد السلام

مصر العروبة جنود الحق من دونها

يا فرز الارهاب والتخريب جُند الظلام

أقرب اسرائيل لكنْكم تهابونها!!

عاشت مصر رغم أنوف آبائكم يا لئام

إن قدّر الله فشلتوا ما تحَكْمونها

يا الله يا منصف المظلوم

سلّط على المجرم الظالم

الوضع في سورية معلوم

المشكلة باقي العالم!

بين الضرايب والزياده بالاسعار

صار المواطن بين حانا ومانا

يشوف ماله يذهب ايمين وايسار

ويقول: ليت اللي عطاهم عطانا

أخطر من الارهاب صنّاع الارهاب

حضارةٍ بالخبث تهدم حضاره

حنّا نفكّر في النتايج والاسباب

والغير يحسبها بربح وخساره